३०० ज्येष्ठ साहित्यिक कलावंत वारकऱ्यांच्या रखडलेल्या मानधनासाठी आंदोलनाला यश

प्रशासनाकडून तातडीने कार्यवाहीचे आश्वासन

               ब्लॅक अँड व्हाईट शहापूर प्रतिनिधी

अखिल भारतीय कलावंत न्याय हक्क समिती, ठाणे जिल्ह्याच्या वतीने जिल्ह्यातील ज्येष्ठ साहित्यिक कलावंत वारकऱ्यांच्या रखडलेल्या मानधनासाठी करण्यात आलेल्या पाठपुराव्याला अखेर यश आले आहे. सन २०२५-२६ या वर्षातील सुमारे ३०० ज्येष्ठ साहित्यिक कलावंत वारकऱ्यांचे रखडलेले मानधन तातडीने मिळावे, या मागणीसाठी समितीने जिल्हाधिकारी कार्यालय, ठाणे येथे आंदोलन व निवेदनाद्वारे प्रशासनाचे लक्ष वेधले.

या आंदोलनाच्या पार्श्वभूमीवर जिल्हाधिकारी कार्यालयातील अधिकाऱ्यांनी संबंधित विषयाची दखल घेत मानधनाच्या प्रश्नावर आवश्यक कार्यवाही करण्याबाबत सकारात्मक भूमिका घेतली. त्यामुळे गेल्या वर्षभरापासून रखडलेल्या मानधनाच्या प्रश्नाला आता गती मिळण्याची शक्यता निर्माण झाली आहे.

अखिल भारतीय कलावंत न्याय हक्क समितीचे ठाणे जिल्हा अध्यक्ष बालासाहेब शिंगोळे यांच्या नेतृत्वाखाली हा पाठपुरावा करण्यात आला. समितीच्या पदाधिकाऱ्यांनी जिल्हाधिकारी कार्यालय तसेच संबंधित प्रशासकीय अधिकाऱ्यांकडे वारंवार निवेदने देऊन कलावंतांच्या मानधनाचा प्रश्न तातडीने मार्गी लावण्याची मागणी केली.

यावेळी समितीच्या पदाधिकाऱ्यांनी स्पष्ट केले की, ज्येष्ठ साहित्यिक, कलावंत व वारकरी यांनी आपल्या कला-साहित्याच्या माध्यमातून समाजाची सांस्कृतिक परंपरा जपण्याचे काम केले आहे. शासनाच्या विविध योजनांतून त्यांना मिळणारे मानधन हे त्यांच्या कलेचा सन्मान असून ते वेळेवर मिळणे आवश्यक आहे. मात्र ठाणे जिल्ह्यातील अनेक कलावंतांचे मानधन रखडल्याने त्यांच्यामध्ये नाराजी निर्माण झाली होती.

बैठकीत अधिकाऱ्यांकडून सकारात्मक प्रतिसाद

मानधनाच्या प्रश्नावर जिल्हाधिकारी कार्यालयात झालेल्या चर्चेदरम्यान समितीच्या प्रतिनिधींनी कलावंतांच्या अडचणी प्रशासनासमोर मांडल्या. जिल्हाधिकारी कार्यालयातील तसेच संबंधित विभागातील अधिकाऱ्यांनी विषयाची माहिती घेऊन आवश्यक प्रक्रिया पूर्ण करण्याबाबत चर्चा केली.

समितीच्या म्हणण्यानुसार, जिल्ह्यातील तालुकास्तरावर कलावंतांची माहिती, आवश्यक कागदपत्रे आणि मानधनासंदर्भातील प्रक्रिया याबाबतही संबंधित यंत्रणेकडून कार्यवाही करण्याची आवश्यकता आहे. त्यामुळे केवळ आश्वासन न देता प्रत्यक्ष मानधन खात्यावर जमा होईपर्यंत पाठपुरावा सुरू ठेवण्याचा निर्धार समितीने व्यक्त केला.

“मानधन आमच्या हक्काचे; ते आम्हाला मिळालेच पाहिजे”

कलावंत न्याय हक्क समितीच्या पदाधिकाऱ्यांनी सांगितले की, गेल्या अनेक महिन्यांपासून कलावंत आपल्या मानधनाची प्रतीक्षा करीत आहेत. अनेक ज्येष्ठ कलावंतांनी आयुष्यभर कला, साहित्य, लोकपरंपरा आणि सांस्कृतिक क्षेत्रासाठी योगदान दिले आहे. त्यामुळे शासनाकडून मंजूर असलेले मानधन वेळेत मिळणे हा त्यांचा हक्क आहे.

समितीने यापुढेही जिल्ह्यातील कलावंतांच्या समस्या प्रशासनापर्यंत पोहोचविण्यासाठी संघटितपणे काम करण्याचा निर्धार केला आहे. “मानधन आमच्या हक्काचे, ते आम्हाला मिळणारच,” असा निर्धार यावेळी व्यक्त करण्यात आला.

विविध पदाधिकाऱ्यांची उपस्थिती

या आंदोलन व पाठपुराव्यात समितीचे ठाणे जिल्हा अध्यक्ष बालासाहेब शिंगोळे, जिल्हा उपाध्यक्ष संतोषसेठ घरत, जिल्हा सचिव श्री. वसंत महाराज वकुंडे, प्रसिद्धी प्रमुख श्री. रमेश घरत, जिल्हा संघटक श्री. सुरेश बुवा घरत, जिल्हा सल्लागार श्री. जनार्दन महाराज व्यापारी यांच्यासह विविध तालुक्यांतील पदाधिकारी व कलावंत सहभागी झाले होते.

यामध्ये कल्याण तालुका अध्यक्ष श्री. दत्तात्रय मोरे, उपाध्यक्ष श्री. लक्ष्मण शेलार, ठाणे जिल्हा संपर्क अध्यक्ष वैशाली पाटील सचिव विठ्ठल पोंडेकर सहसचिव नामदेव खडके सल्लागार वसंत वरकुटे मुरबाड तालुका अध्यक्ष श्री. किशोर म्हात्रे, उपाध्यक्ष श्री. सागर बुवा मारथे, शहापूर तालुका अध्यक्ष श्री. नरेश दादा निमसे, कार्याध्यक्ष श्री. विठ्ठल बुवा वरकुंडे तसेच इतर पदाधिकारी व कलावंत उपस्थित होते.

पाठपुरावा सुरूच राहणार

ठाणे जिल्ह्यातील कलावंतांच्या विविध प्रश्नांसाठी समितीच्या माध्यमातून सातत्याने पाठपुरावा करण्यात येणार असल्याचे पदाधिकाऱ्यांनी सांगितले. रखडलेले मानधन मिळण्याबरोबरच नवीन पात्र कलावंतांना मानधन योजनेचा लाभ मिळावा, कलाकारांच्या प्रश्नांवर तालुकास्तरावर प्रभावी यंत्रणा निर्माण व्हावी आणि कलावंतांना शासनाच्या योजनांची माहिती मिळावी, यासाठीही प्रयत्न करण्यात येणार आहेत.

कलावंतांच्या एकजुटीमुळे आणि सातत्यपूर्ण पाठपुराव्यामुळे मानधनाच्या प्रश्नाला प्रशासनाने सकारात्मक प्रतिसाद दिल्याचे समितीने म्हटले आहे. मात्र प्रत्यक्ष मानधन मिळेपर्यंत पाठपुरावा थांबविणार नसल्याचेही समितीच्या पदाधिकाऱ्यांनी स्पष्ट केले.

“ठाणे जिल्ह्यातील प्रत्येक कलावंताला न्याय मिळवून देण्यासाठी समिती कटिबद्ध आहे. कलावंतांचा सन्मान आणि त्यांच्या हक्कांचे संरक्षण यासाठी संघटितपणे लढा सुरूच राहील,” असा निर्धार यावेळी व्यक्त करण्यात आला.