सांस्कृतिक नगरी डोंबिवलीत अंधश्रद्धेविरोधी रणशिंग

 

फलज्योतिष व बुवाबाजी विरोधी संघर्ष परिषदेचा एल्गार

                      ब्लॅक अँड व्हाईट कल्याण वार्ताहर 

अंधश्रद्धा, बुवाबाजी आणि फलज्योतिषाच्या माध्यमातून होणाऱ्या शोषणाविरोधात वैज्ञानिक दृष्टिकोनाचा जागर करण्यासाठी महाराष्ट्र अंधश्रद्धा निर्मूलन समिती, ठाणे जिल्ह्याच्या वतीने डोंबिवलीत फलज्योतिष व बुवाबाजीविरोधी संघर्ष परिषद उत्साहात पार पडली. रविवारी जोंधळे विद्या समूहाच्या सभागृहात झालेल्या या परिषदेत विविध सामाजिक संघटनांचे पदाधिकारी, कार्यकर्ते तसेच सिने-नाट्य क्षेत्रातील मान्यवर सहभागी झाले.

परिषदेचे उद्घाटन प्रा. डॉ. अभिजीत देशपांडे यांच्या हस्ते झाले. यावेळी अंधश्रद्धा, शोषण, अज्ञान, ग्रहदोष आणि भूतबाधा यांच्या विळख्यात अडकलेल्या महिलेची प्रतीकात्मक साखळदंडातून मुक्तता करण्यात आली. त्यानंतर तिला वैज्ञानिक दृष्टिकोनाचा प्रतीकात्मक मुकुट परिधान करून स्वातंत्र्य, संविधान आणि निर्भयता या मूल्यांची माला घालण्यात आली.

प्रा. डॉ. अभिजीत देशपांडे यांनी सश्रद्ध बालपणापासून सध्याच्या अश्रद्धेपर्यंतचा आपला प्रवास मांडला. “जिथे अंधश्रद्धा असते, तिथे विवेकाचा अभाव असतो. विज्ञान शिकणे आणि वैज्ञानिक दृष्टिकोन असणे यात फरक आहे,” असे त्यांनी सांगितले. महाराष्ट्रातील संत परंपरेने ज्ञान आणि विकासाची वाट दाखवल्याचेही त्यांनी नमूद केले.

विष्णूनगर पोलीस ठाण्याचे सहायक पोलीस निरीक्षक अभिजीत मोरे यांनीही मार्गदर्शन केले. “अंधश्रद्धा प्रश्न विचारू देत नाही; मात्र विज्ञान प्रश्न विचारायला आणि चौकस बनायला शिकवते,” असे त्यांनी सांगितले.

जिल्हा कार्याध्यक्ष डॉ. सुषमा बसवंत यांनी परिषदेची प्रस्तावना केली. ‘बुवाबाजीचे वाढते प्रकार’ या सत्रात ॲड. रंजना गवांदे यांनी धर्माच्या आडून आधुनिक डिजिटल साधने व संकल्पनांचा वापर करून फसवणूक आणि शोषणाचे प्रकार होत असल्याचे सांगितले. यामध्ये महिलांना मोठ्या प्रमाणात लक्ष्य केले जात असल्याचेही त्यांनी नमूद केले.अंधश्रद्धा निर्मूलन पत्रिकेचे कार्यकारी संपादक उत्तम जोगदंड यांनी खगोलशास्त्र हे शास्त्र असून त्याचा आधार घेतलेले फलज्योतिष हे फसवे विज्ञान असल्याचे सांगत वास्तुशास्त्र, अंकशास्त्र, कुंडली जुळवणे, कालसर्प योग आणि भविष्यकथन यांसारख्या प्रकारांवर भाष्य केले. प्रकाशन विभागाचे कार्यवाह मच्छिंद्रनाथ मुंडे यांनी विविध तथाकथित चमत्कारांचे प्रयोग करून दाखवतानाच ‘माईंड रीडिंग’चे प्रात्यक्षिकही सादर केले.

परिसरात चळवळीशी संबंधित पुस्तकांचा स्टॉल तसेच जादूटोणाविरोधी कायदा आणि खगोलशास्त्रासंदर्भातील माहिती देणाऱ्या बॅनर्सचे प्रदर्शनही भरवण्यात आले होते. सिने-नाट्य अभिनेते सिद्धार्थ कडलक यांच्यासह विविध समविचारी सामाजिक संघटनांचे पदाधिकारी उपस्थित होते. जिल्हा प्रधान सचिव राजेश देवरुखकर यांनी आभार मानले. 

ही परिषद यशस्वी व्हावी यासाठी ॲड. तृप्ती पाटील, किरण इशी, नितीन वानखेडे, प्रियंका सवाखंडे, मंगल मोरे, दिवेंद्र मोरे, अनिल ठाणेकर, अशोक मोहिते, ज्योती मेश्राम, छाया गायकवाड, प्रज्ञा चव्हाण,संजय त्रिभुवन, ॲड.सुरेश कापरे, ॲड विनोद जगताप,हनुमंत देडगे,संतोष मात्रे, ॲड निर्मल सोनवणे, मुकुंद देसाई,शाहीर एस एस शिंदे व सर्व शाखांच्या सदस्यांनी खूप परिश्रम घेतले.