​'SOPEP'तर्फे स्मार्ट ऊर्जा आणि शाश्वत विकासावर राष्ट्रीय परिसंवाद संपन्न

 ​महावितरणच्या डॉ. अनिता चौधरी यांच्या 'स्मार्ट मीटरिंग'वरील व्याख्यानाला उदंड प्रतिसाद

सोसायटी ऑफ पॉवर अँड एनर्जी प्रोफेशनल्स (SOPEP) च्या वतीने नुकताच ऐरोली स्पोर्ट्स असोसिएशन येथे "जागतिक दर्जाच्या सुरक्षा पद्धती, शाश्वत विकास, प्रभावी ऊर्जा बचत आणि आधुनिक तंत्रज्ञानावर आधारित प्लांट संचालन व देखभाल" या विषयावर एक दिवसीय राष्ट्रीय परिसंवाद उत्साहात पार पडला. या कार्यक्रमात महावितरणच्या डॉ. अनिता चौधरी यांनी मांडलेल्या अभ्यासपूर्ण विचारांना उपस्थितांकडून उत्स्फूर्त प्रतिसाद मिळाला.

​या परिसंवादात 'नेट झेरो' (Net Zero) लक्ष्याच्या पार्श्वभूमीवर बोलताना, महावितरणच्या डॉ. अनिता चौधरी यांनी "रिव्होल्युशनायझिंग ग्रिड मॅनेजमेंट: स्मार्ट मीटरचे धोरणात्मक अंमलबजावणी आणि प्रभाव" या विषयावर अत्यंत प्रभावी मार्गदर्शन केले. ग्रिड व्यवस्थापनातील स्मार्ट मीटरिंग तंत्रज्ञानाची भूमिका आणि भविष्यातील शक्यता त्यांनी साध्या व सोप्या भाषेत विशद केल्या. 

"स्मार्ट मीटरमुळे वीज वितरण प्रणालीत मोठी पारदर्शकता येत असून, ऊर्जा बचतीसोबतच ग्राहकांना याचा प्रत्यक्ष फायदा कसा होतो," हे त्यांनी विविध उदाहरणांद्वारे पटवून दिले.

या राष्ट्रीय परिसंवादाचे उद्घाटन SOPEP चे अध्यक्ष अशोक वानखेडे आणि ऐरोली स्पोर्ट्स असोसिएशनचे अध्यक्ष डॉ. संजय डोके यांच्या हस्ते झाले. कार्यक्रमास लिसनलाइट्स चे व्यवस्थापकीय संचालक कमलेश शाह, NTPC चे प्रादेशिक कार्यकारी संचालक इ. सत्य फणी कुमार, मॉडरेटर एस. आर. कारखानीस, मैनाक मुखर्जी, प्रदीप्तो बसू रॉय, भूषण मानकमे आणि SOPEP चे उपाध्यक्ष इंद्रनील घोष यांसारखे ऊर्जा क्षेत्रातील दिग्दर्शक उपस्थित होते.

​या कार्यक्रमात NTPC, टाटा पॉवर, MSEDCL, MEIL अनपरा, IRISS, फादर रॉड्रिग्स इन्स्टिट्यूट आणि के. जे. सोमय्या यांसारख्या देशभरातील प्रमुख संस्थांचे प्रतिनिधी सहभागी झाले होते. एकूण आठ तांत्रिक शोधनिबंध सादर करण्यात आले.

​के. जे. सोमय्या पॉलिटेक्निकचे प्रा. रोहन होमकर यांनी या परिसंवादाच्या यशस्वी आयोजनात मोलाची भूमिका बजावली. तरीही, डॉ. अनिता चौधरी यांनी स्मार्ट मीटरिंगच्या माध्यमातून ऊर्जा व्यवस्थापनाच्या नव्या क्षितिजांकडे वेधलेले लक्ष हा या संपूर्ण सोहळ्याचा केंद्रबिंदू ठरला.