खासदार डॉ. श्रीकांत शिंदे यांनी घेतली केडीएमसी आयुक्तांची भेट २७ गावांतील कर्मचाऱ्यांचा केडीएमसीत समाविष्ट करण्याबाबत घेतली बैठक

                 ब्लॅक अँड व्हाईट कल्याण वार्ताहर 

कल्याण डोंबिवली महापालिकेत आज २७ गावांतील कर्मचाऱ्यांचा महानगरपालिकेत समाविष्ट करण्याबाबत खासदार डॉ. श्रीकांत शिंदे यांच्या उपस्थितीत केडीएमसी आयुक्त अभिनव गोयल यांच्या दालनात महत्वाची बैठक पार पडली. यावेळी बैठकीत विविध प्रश्नांवर सविस्तर चर्चा करण्यात आली. यावेळी आमदार राजेश मोरे, जिल्हाप्रमुख गोपाळ लांडगे, आगरी युथ फोरमचे अध्यक्ष गुलाब वझे, कल्याण डोंबिवली महापालिका आयुक्त अभिनव गोयल यांच्यासह पालिका अधिकारी, स्थानिक पदाधिकारी कार्यकर्ते आणि अधिकारी उपस्थित होते.

उपमुख्यमंत्री एकनाथ शिंदे यांच्या मुख्यमंत्रीपदाच्या कार्यकाळात २७ गावातील ग्रामपंचायतीमधील ४९९ कर्मचाऱ्यांचा कल्याण डोंबिवली महापालिकेत समावेश करण्याचा निर्णय झाला होता. मात्र या कर्मचाऱ्यांची ज्या पदावर नियुक्ती झाली होती त्याच पदावर त्यांना महानगरपालिकेत रुजू करण्यात यावे अशी मागणी सातत्याने करण्यात येत होती. या मागणीबाबत शासनाकडे प्रस्ताव देखील पाठवण्यात आला होता. याला शासनाने मंजूरी दिली असून २७ गावातील सर्व कर्मचारी ज्या पदावर रुजू झाले होते त्याच पदावर त्यांच्या शैक्षणिक पात्रतेनुसार महापालिकेतही कार्यरत राहतील असा निर्णय शासनाकडून घेण्यात आला आहे. तर यातील १८० कर्मचाऱ्यांना नवरात्रीच्या दरम्यान याबाबतचे पत्र देखील देण्यात येईल,असे बैठकीत स्पष्ट करण्यात आले.

 याचबरोबर यातील निरक्षर कर्मचाऱ्यांना मेडिकल व पोलीस व्हेरिफिकेशन देण्यात यावे, गावातील मयत व निवृत्त कर्मचाऱ्यांच्या वारसांना नोकरी व पेन्शन लागू करण्यात यावे. ज्या कर्मचाऱ्यांचे शिक्षण कमी असल्यास, त्यांना निकष पूर्ण करणासाठी तीन वर्षांची मुदत दिली जावी. याबाबत चर्चा करण्यात आली. कचोरे टेकडी येथील संत सावळाराम महाराजांच्या स्मारक उभारणीबाबत सविस्तर चर्चा करण्यात आली. स्मारक उभारणीसाठी निधीची उपलब्धता झाली असून लवकरच स्मारकाच्या उभारणीचे काम सुरू करण्याच्या सूचना यावेळी महापालिकेला दिल्या. 

   २७ गावातील नागरिकांना भरावा लागणाऱ्या पाणी कराबाबत यावेळी चर्चा करण्यात आली. याबाबत लवकरच आढावा बैठक आयोजित करून हा प्रश्न देखील मार्गी लावण्यात येईल असे सांगण्यात आले.