केडीएमसीचे ना हरकत पत्र घेई पर्यन्त स्टेमचे काम बंद करण्याची भाजपाची मागणी

 

भाजपाचे मोहने टिटवाळा मंडळ सचिव

सुशीलकुमार पायाळ यांचे केडीएमसी

आयुक्तांना पत्र

               ब्लॅक अँड व्हाईट कल्याण वार्ताहर 

कल्याण डोंबिवली महानगरपालिकेच्या “अ” प्रभाग क्षेत्रात मोहने पंप हाऊस शेजारी स्टेम प्राधिकरण कल्याण डोंबिवली महानगरपालिकेला अंधारात ठेवून प्रकल्प करत असून हे काम करण्यासाठी केडीएमसीकडून कोणतेही ना हरकत प्रमाणपत्र घेण्यात आले नाही. त्यामुळे केडीएमसीचे ना हरकत पत्र घेई पर्यंत स्टेम प्राधिकरणाचे काम थांबविण्याची मागणी भारतीय जनता पार्टीने केली आहे. याबाबत भाजपाचे मोहने टिटवाळा मंडळ सचिव सुशीलकुमार पायाळ यांनी केडीएमसी आयुक्तांना पत्र दिले आहे.  

कल्याण-डंबिवली महानगरपालिकेच्या १”अ” प्रभाग क्षेत्रातील मोहने पंप हाऊस शेजारी उल्हास नदीवर स्टेम प्राधिकरण ठाणे महानगरपालिका तसेच मीरा भाईंदर महानगरपालिकेच्या पाणीपुरवठ्यासाठी प्रकल्प राबवत आहे.  परंतु प्रकल्प राबवत असताना स्थानिक पालिका प्रशासनाला स्टेम प्राधिकरणाने अवगत करून देणे अपेक्षित होते. स्टेम प्राधिकरणाने कुठल्याही प्रकारे अद्याप पर्यंत प्रकल्पा बाबत एकही पत्र कल्याण डोंबिवली महानगरपालिकेला दिलेले नाही. तसेच कल्याण डोंबिवली महानगरपालिकेच्या कुठल्याही अधिकाऱ्याला प्रकल्पाबाबत लेखी स्वरूपात अवगत करून दिलेले नाही.

स्टेम प्राधिकरणाचा प्रकल्प केडीएमसी हद्दीत येत असल्याने भविष्यात प्रकल्पाच्या ठिकाणी कुठल्याही प्रकारचा अपघात झाल्यास किंवा कुठलीही आपत्ती आल्यास सर्वप्रथम विचारणा आयुक्तांना होईल. त्यामुळे या प्राधिकरणाला तात्काळ कल्याण डोंबिवली महानगरपालिकेची ना हरकत घेणे कामी सुचित करून प्रकल्पाबाबत संपूर्ण माहिती कल्याण डोंबिवली महानगरपालिकेस उपलब्ध करावी. तसेच स्टेम प्राधिकरण जोपर्यंत कल्याण डोंबिवली महानगरपालिका प्रशासनाची ना हरकत प्राप्त करत नाही तोपर्यंत स्टेम प्राधिकरणास सुरू असलेले काम बंद करण्याचे आदेशित करावे. जेणेकरून उद्या कुठल्याही प्रकारचा अपघात किंवा आपत्ती निर्माण झाल्यास आपण आयुक्त म्हणून जबाबदार राहणार नाही असे सुशीलकुमार पायाळ यांनी आपल्या पत्रात नमूद केले आहे. 

दरम्यान स्टेमच्या वतीने सुरू असलेल्या कामा संदर्भात केडीएमसी पाणी पुरवठा कार्यकारी अभियंता अशोक घोडे यांच्याशी संपर्क साधला असता त्यांनी सांगितले की, स्टेमच्या सुरू असलेल्या कामासंदर्भात आमच्या विभागाला पत्र प्राप्त नसून संदर्भीत परिसरातील स्थानिक स्वराज्य संस्था केडीएमसीला याबाबत, स्टेम, लघु पाटबंधारे विभागाने समन्वय साधण्याच्या दुष्टीकोनातून कळविणे गरजेचे आहे."