पाऊस लांबल्याने पेरण्या खोळंबल्या

                ब्लॅक अँड व्हाईट मुरबाड रमेश घरत

यंदा मान्सूनचे आगमन अपेक्षेपेक्षा उशिरा होत असल्याने ग्रामीण भागात चिंतेचे वातावरण निर्माण झाले आहे. गेल्या वर्षी मे महिन्यातच अनेक भागांत पावसाने हजेरी लावली होती. मात्र यंदा जून महिन्याची १३ तारीख उलटूनही समाधानकारक पावसाची सुरुवात झालेली नाही. परिणामी खरीप हंगामाच्या पेरण्या खोळंबल्या असून शेतकरीराजा आकाशाकडे आशेने नजर लावून बसला आहे.

सतत वाढणारा उकाडा, प्रचंड उष्मा आणि हवेत वाढलेली आर्द्रता यामुळे जनजीवन विस्कळीत झाले आहे. शहरी भागातील नागरिक उकाड्याने हैराण झाले असून ग्रामीण भागातही नागरिकांची अवस्था बिकट झाली आहे. दिवसभर अंगाची लाही लाही करणाऱ्या उन्हामुळे कामकाजावर परिणाम होत असून पाण्याची मागणीही वाढली आहे.

शेतकऱ्यांनी खरीप हंगामासाठी बी-बियाणे, खते आणि इतर साहित्याची तयारी करून ठेवली आहे. मात्र पावसाअभावी शेतीची मशागत आणि पेरणीची कामे थांबली आहेत. वेळेवर पाऊस न झाल्यास उत्पादनावर परिणाम होण्याची भीती शेतकरी व्यक्त करत आहेत.

दरम्यान, मागील काही दिवसांत आखाती देशांमध्ये मुसळधार पावसाची नोंद झाली असून अनेक ठिकाणी पूरस्थिती निर्माण झाल्याच्या बातम्या समोर आल्या आहेत. एका बाजूला अतिवृष्टी तर दुसऱ्या बाजूला पावसाचा खंड अशी परिस्थिती जगभर दिसून येत आहे. हवामानातील हे बदल जागतिक तापमानवाढीचे परिणाम असल्याची चिंता पर्यावरण तज्ज्ञांकडून व्यक्त केली जात आहे.

हवामानातील वाढते असंतुलन, उष्णतेच्या लाटा, अनियमित पाऊस आणि बदलते ऋतुचक्र यामुळे शेती, जलस्रोत आणि सर्वसामान्यांच्या जीवनमानावर परिणाम होत आहे. त्यामुळे वेळेवर आणि समाधानकारक पावसाची प्रतीक्षा आता शेतकरी, नागरिक आणि प्रशासनालाही लागली आहे. येत्या काही दिवसांत मान्सून सक्रिय होऊन दिलासा देणारा पाऊस पडेल, अशी आशा सर्वजण व्यक्त करीत आहेत.