कॅन्सरविरोधातील जनजागृतीसाठी टिटवाळ्यात ऐतिहासिक मॅरेथॉन; जनतेचा उत्स्फूर्त प्रतिसाद..!

        कॅन्सरविरोधातील जनजागृतीसाठी 

      टिटवाळ्यात मॅरेथॉनचे आयोजन 

    जनतेचा उत्स्फूर्त प्रतिसाद..!

            ब्लॅक अँड व्हाईट/ टिटवाळा उमेश जाधव 

 कॅन्सरविरोधातील जनजागृतीसाठी आयोजित 'रन फॉर फाईट अगेन्स्ट कॅन्सर' मॅरेथॉन आज एक सामाजिक सोहळा म्हणून यशस्वीरित्या संपन्न झाली. महागणपती मंदिराच्या पवित्र प्रांगणातून सूर्योदयाच्या साक्षीने सुरू झालेल्या या मॅरेथॉनमध्ये तरुणाईसह विविध वयोगटातील नागरिकांनी उत्साहाने सहभाग घेतला.

कार्यक्रमाचे उद्घाटन करताना जिल्हाधिकारी अशोक शिनगारे यांनी कॅन्सरविरोधातील लढ्यात जनतेच्या सहभागाचे महत्त्व अधोरेखित केले. “कॅन्सरविरोधातील लढा हा केवळ वैद्यकीय क्षेत्रापुरता मर्यादित नसून समाजातील प्रत्येक घटकाचा त्यात वाटा असला पाहिजे. जनजागृतीच्या माध्यमातून आरोग्यसाक्षरता वाढवणे ही आपली सामूहिक जबाबदारी आहे,” असे ते म्हणाले.  

मॅरेथॉनच्या आधी महागणपती मंदिरात गणेशपूजा आणि आरती करण्यात आली. जिल्हाधिकारी शिनगारे आणि कल्याण तहसीलदार सचिन शेजल यांनी महागणपतीचे दर्शन घेत परिसराला शुभेच्छा दिल्या. मंदिर विश्वस्त सुभाष जोशी यांनी मान्यवरांचा सत्कार केला.

  

५ किमी आणि ३ किमी अशा दोन गटांमध्ये पार पडलेल्या या मॅरेथॉनमध्ये टिटवाळा व परिसरातील लोकांनी मोठ्या प्रमाणावर सहभाग घेतला. तरुणांच्या उत्साहाने वातावरण भारावून गेले होते. रेड स्वस्तिक सोसायटी, स्पर्श फाउंडेशन, स्पंदन फाउंडेशन, आणि आनंद होम्स या संस्थांनी संयुक्तपणे या उपक्रमाचे आयोजन केले. प्रमोद नांदगावकर यांनी उपस्थितांना उद्देशून सामाजिक एकजुटीचे महत्त्व अधोरेखित केले आणि कॅन्सरविरोधातील लढ्यात प्रत्येकाच्या सहभागाचे आवाहन केले.

राजकीय, सामाजिक, आणि वैद्यकीय क्षेत्रातील मान्यवरांच्या उपस्थितीने या कार्यक्रमाला भव्यतेची जोड मिळाली. नागरिकांमधील आरोग्यविषयक जागरूकता आणि सामाजिक जाणीव वाढवण्याचा आयोजकांचा उद्देश या मॅरेथॉनने साध्य केला. 

“आरोग्य हीच खरी संपत्ती आहे,” हा संदेश देणाऱ्या या मॅरेथॉनने टिटवाळ्यातील लोकांना नवा दृष्टिकोन दिला. “सामाजिक आणि आरोग्य चळवळींमध्ये जनतेने पुढाकार घ्यावा,” असे जिल्हाधिकारी शिनगारे यांनी पुन्हा एकदा सांगितले.  

संपूर्ण परिसर आज सामाजिक चेतनेने भारावून गेला होता. हा उपक्रम येणाऱ्या काळात कॅन्सरविरोधातील लढ्यात एक नवा आदर्श ठरेल, याबाबत सर्वांनी आशावाद व्यक्त केला.